ചലച്ചിത്രമേളയുടെ കൊച്ചി പതിപ്പ് ഇന്ന്

കേരള സര്‍ക്കാരിന്റെ സാംസ്കാരിക വകുപ്പിനുവേണ്ടി ചലച്ചിത്ര അക്കാദമി സംഘടിപ്പിക്കുന്ന 25ാമത് അന്താരാഷ്ട്ര ചലച്ചിത്രമേളയുടെ കൊച്ചി പതിപ്പ് ഇന്ന് വൈകുന്നേരം ആരംഭിക്കും. ഐ.എഫ്.എഫ്.കെ പോലെ ലോകശ്രദ്ധയാകര്‍ഷിച്ച ഒരു സാംസ്കാരിക പരിപാടി പൂര്‍ണമായും ഒഴിവാക്കുന്നത് ഉചിതമല്ലെന്ന് തോന്നിയ സാഹചര്യത്തിലാണ് എല്ലാവിധ സുരക്ഷാ മാനദണ്ഡങ്ങളും പാലിച്ചുകൊണ്ട് മേള സംഘടിപ്പിച്ചിരിക്കുന്നത്. കേരളത്തിന്റെ ചലച്ചിത്ര സംസ്കാരത്തിന് നിര്‍ണായകമായ സംഭാവനകള്‍ നല്‍കിയ ഐ.എഫ്.എഫ്.കെയുടെ രജതജൂബിലി പതിപ്പ് കൂടിയാണ് ഇത്. അതിനോടനുബന്ധിച്ച് സംവിധായകൻ കെ ജി ജോർജിന്‍റെ നേതൃത്വത്തിൽ മലയാളചലച്ചിത്രരംഗത്തെ 25 പ്രമുഖ വ്യക്തികൾ ചേർന്ന് 25 ദീപനാളങ്ങൾ തെളിയിച്ചുകൊണ്ടാണ് മേളയ്ക്ക് തുടക്കം കുറിക്കുന്നത്. സാംസ്കാരിക മന്ത്രി എ.കെ. ബാലനാണ് മേളയുടെ ഉദ്ഘാടന കർമ്മം ഓൺലൈനായി നിർവ്വഹിക്കുന്നത്. കൊച്ചിയിലെ പ്രധാന വേദിയായ സരിത തീയേറ്ററിൽ ടി.ജെ. വിനോദ് എംഎൽഎ അധ്യക്ഷത വഹിക്കുന്ന ചടങ്ങിൽ എംഎൽഎമാരായ പി.ടി. തോമസ്, എം. സ്വരാജ്, കെ.ജെ. മാക്സി, ജോൺ ഫെർണാണ്ടസ് എന്നിവർ ആശംസയർപ്പിക്കുകയും മേയർ എം. അനിൽകുമാർ ഫെസ്റ്റിവൽ ബുള്ളറ്റിനിന്‍റെ പ്രകാശനം ഫെഫ്ക ജനറൽ സെക്രട്ടറി ബി. ഉണ്ണികൃഷ്ണന് നൽകിക്കൊണ്ട് നിർവഹിക്കുകയും ചെയ്യും. ചലച്ചിത്ര അക്കാദമി ചെയർമാൻ കമൽ വൈസ് ചെയർപേഴ്സൺ ബീന പോൾ സെക്രട്ടറി അജോയ് ചന്ദ്രൻ ചലച്ചിത്ര സംഘടന പ്രതിനിധികൾ എന്നിവരും ചടങ്ങിൽ പങ്കെടുക്കും. ഉദ്ഘാടന ചിത്രമായി ജാസ്മില സബാനിക്ക് സംവിധാനം ചെയ്ത ബോസ്നിയൻ ചിത്രം ക്വോ വാഡിസ്, ഐഡ? എന്ന ചിത്രം പ്രദർശിപ്പിക്കും. തിരുവനന്തപുരത്ത് സ്ഥിരം നടത്താറുള്ള മേളയില്‍ ഓരോ വര്‍ഷവും പതിനാലായിരത്തോളം പ്രതിനിധികളാണ് പങ്കെടുക്കാറുള്ളത്. കോവിഡിന്റെ സാഹചര്യത്തില്‍ ഇത് പ്രായോഗികമല്ലാത്തതിനാല്‍ ആണ് കേരളത്തിൻ്റെ നാലു മേഖലകളിലായി ഇത്തവണ ഐ.എഫ്.എഫ്.കെ സംഘടിപ്പിക്കുന്നത്. പൂര്‍ണമായും കോവിഡ് മാനദണ്ഡങ്ങള്‍ പാലിച്ചുകൊണ്ട് തിരുവനന്തപുരം, എറണാകുളം, തലശ്ശേരി, പാലക്കാട് എന്നിവിടങ്ങളിലാണ് മേള നടക്കുക. തിരുവനന്തപുരത്ത് 2021 ഫെബ്രുവരി 10 മുതല്‍ 14 വരെ മേള നടന്നത്. കൊച്ചിയിൽ ഫെബുവരി 17 മുതല്‍ 21 വരെയും, തലശ്ശേരിയില്‍ ഫെബുവരി 23 മുതല്‍ 27 വരെയും, പാലക്കാട് മാര്‍ച്ച് 1 മുതല്‍ 5 വരെയും മേള നടക്കും. കൊവിഡ് സാഹചര്യത്തിലും ഡെലിഗേറ്റുകളുടെ സഹകരണത്താൽ തിരുവനന്തപുരത്ത് നടന്ന മേള പൂർണ വിജയമായിരുന്നുവെന്ന് ചലച്ചിത്ര അക്കാദമി ചെയർമാൻ കമൽ അറിയിച്ചു. ഓരോ മേഖലയിലും അഞ്ചു തിയേറ്ററുകളിലായി അഞ്ചു ദിവസങ്ങളില്‍ മേള നടക്കും. ഓരോ തിയേറ്ററിലും 200 പേര്‍ക്ക് മാത്രമേ പ്രവേശനം അനുവദിക്കുകയുള്ളൂ. മേളയുടെ ഭാഗമായി പൊതുപരിപാടികളോ, ആള്‍ക്കൂട്ടം കൂടുന്ന സാംസ്കാരിക പരിപാടികളോ ഉണ്ടായിരിക്കുന്നതല്ല. ഉദ്ഘാടന, സമാപനച്ചടങ്ങുകളില്‍ പരമാവധി 200 പേരെ മാത്രമേ പങ്കെടുപ്പിക്കുകയുള്ളൂ. ഇന്‍റര്‍നാഷണൽ കോംപറ്റീഷൻ, മലയാള സിനിമ ഇന്ന്, ഇന്ത്യൻ സിനിമ ഇന്ന്, ലോക സിനിമ, കാലിഡോസ്കോപ്പ്, ഗൊദാർദ്- നിത്യയുവത്വം, സിനിമ കവിതയാകുമ്പോൾ – ലീ ഴാങ് ഡോങ്, ഹോമേജ് എന്നിങ്ങനെ എല്ലാ വിഭാഗങ്ങളും മേളയില്‍ ഉണ്ടായിരിക്കും.