മാലിക് തിയേറ്ററുകളിലേക്ക്

മഹേഷ് നാരായണന്റെ സംവിധാനത്തിൽ ഫഹദ് ഫാസിൽ മുഖ്യ വേഷത്തിലെത്തുന്ന ‘മാലിക്’ മെയ് 31 ന് തീയേറ്ററുകളിൽ എത്തും. ഫഹദിന്റെ കരിയറിലെ ഏറ്റവും ഉയർന്ന ബജറ്റിലൊരുങ്ങിയ പിരീഡ് ത്രില്ലർ പെരുന്നാൾ റിലീസായിരിക്കുമെന്ന് നിർമ്മാതാക്കൾ അറിയിച്ചു. ഇരുപത്തിയഞ്ചു മുതൽ എഴുപത്തിയഞ്ച് വയസ്സ് വരെയുളള ഒരാളുടെ ജീവിതയാത്രയാണ് മാലിക് പറയുന്നത്. ഈ സിനിമക്കുവേണ്ടി 20 കിലോയോളം ശരീരഭാരം ആണ് ഫഹദ് ഫാസിൽ കുറച്ചത്. ഫഹദ് ആദ്യമായാണ് ഒരു സിനിമക്കുവേണ്ടി ഇത്തരം തയ്യാറെടുപ്പുകൾ എടുക്കുന്നതും. 57 വയസുകാരനായ സുലൈമാൻ, തീരദേശ ജനതയുടെ നായകൻ, ഇരുപത് വയസ് മുതൽ 57 വയസ് വരെയുള്ള സുലൈമാന്റെയും അയാളുടെ തുറയുടെയും ജീവിതത്തിന്റെ കഥ പറയുന്നതാണ് മാലിക്. സിനിമയുടെ സെൻസറിങ് പൂർത്തിയായി ക്ലീൻ യു സർട്ടിഫിക്കറ്റ് ആണ് ചിത്രത്തിന് ലഭിച്ചിരിക്കുന്നത്. സെൻസറിംഗിലും പ്രീവ്യൂവിലും മികച്ച റിപ്പോർട്ടാണ് മാലിക്കിന് ലഭിച്ചതെന്ന് സിനിമാ കേന്ദ്രങ്ങൾ സൂചന നൽകുന്നു. ഒരു പൊളിറ്റിക്കൽ ത്രില്ലെർ ചിത്രം എന്നാണ് സംവിധായകൻ മഹേഷ് നാരായണൻ മാലിക്കിനെ കുറിച്ച് പറയുന്നത്. ആന്റോ ജോസഫ് ഫിലിം കമ്പനിയുടെ ബാനറിൽ ആന്റോ ജോസഫ് ആണ് ചിത്രം നിർമ്മിക്കുന്നത്. 27 കോടി രൂപയാണ് ചിത്രത്തിന്റെ ബജറ്റ്. ജോജു ജോർജ്, ദിലീഷ് പോത്തൻ, നിമിഷ സജയൻ, വിനയ് ഫോർട്ട്, ചന്ദു നാഥ്‌ എന്നിവരാണ് ചിത്രത്തിലെ മറ്റ് പ്രധാന താരങ്ങൾ. സാനു ജോൺ ആണ് ചിത്രത്തിന് വേണ്ടി ക്യാമറ ചലിപ്പിക്കുന്നത്. സുഷിൻ ശ്യാം ആണ് സംഗീതം ഒരുക്കിയിരിക്കുന്നത്. ഗാനരചന അൻവർ അലി, സൗണ്ട് ഡിസൈൻ വിഷ്ണു ഗോവിന്ദ്, ശ്രീ ശങ്കർ, കോസ്റ്റുംസ് ധന്യ ബാലകൃഷ്ണൻ എന്നിവരാണ് മറ്റ് അണിയറപ്രവർത്തകർ.